ඇදිරි නිතීය ලිහිල් කළ අවස්ථාවන් හිදී පොදු ප‍්‍රවාහන සේවය ‘‘අත්‍යවශ්‍ය සේවාවන්’’ සදහා පමණක් යෙදවීමට අවධානය යොමුව ඇතැයි විදුලිබල බලශක්ති අමාත්‍යාංශය පවසයි.

නිවේදනයක් නිකුත් කරමින් එම අමාත්‍යාංශය සදහන් කරන්නේ, ලංගම සතුව පවතින බස් රථ පොදු ප‍්‍රවාහන සේවා කටයුතු සදහා යොදවනු ලබන්නේ හුදෙක් අත්‍යවශ්‍ය සේවාවන් වූ සෞඛ්‍ය, ආරක්ෂක සහ රාජ්‍ය ආයතන හා පුද්ගලික ආයතනවල සේවය සදහා ප‍්‍රවාහනය කළයුතුම පිරිස වෙනුවෙන් පමණක් බවත්ය.

මේ වන විට ලංගමය සතුව බස් රථ 5700ක් සහ පුද්ගලික අංශය සතුව බස් රථ 23000 ක් පමණ පවතින අතර ලංගම බස් රථ සියල්ල සමස්ථ දිවයිනම ආවරණය වන පරිදි ධාවනය සදහා යොදවුවත් එය ප‍්‍රමාණවත් නොවන බවත්, දෛනිකව ලැබෙන ආදායම අඩුවීම හේතුවෙන් පුද්ගලික අංශය සිය බස් රථ ධාවනය කිරිමට කැමැත්තක් නොදක්වන බවත් එම අමාත්‍යාංශය බවසයි.

මේ හේතුවෙන් අත්‍යවශ්‍ය රාජකාරීන්ට අමතරව වෙනත් කාරණාවන් සදහා ගමන් කිරීමට පොදු ප‍්‍රවාහන සේවා තුළින් පහසුකම් ලබා නොදෙන බවත්, හුදෙක්ම මෙම තීරණය ගෙන ඇත්තේ කොවිඞ් 19 වසංගත තත්ත්වයෙන් ආරක්ෂාවීම සදහා රජය විසින් ලබා දී ඇති උපදෙස් කි‍්‍රයාත්මක කිරීමත් සදහා පමණක් බවත් අමාත්‍යාංශය සදහන් කරයි.

පුද්ගලික හැදුනුම්පතේ අවසාන අංකයට අනුව ගමන් කිරීමට දින ලබාදෙමින් රජය ඊයේ (25) දිනයේදී ගත් තීරණයට අනුව මෙම තත්ත්වය වඩාත් පහසුවන බව ද එම නිවේදනයේ වැඩිදුරටත් සදහන් වේ.

(නිමන්ති රණසිංහ)

ප්‍රතිචාරයක් ලබාදෙන්න