2026 වසරේ සිට ක්රියාත්මක කිරීමට නියමිත, නව අධ්යාපන ප්රතිසංස්කරණ පිළිබඳව පාර්ලිමේන්තු මන්ත්රීවරුන් දැනුම්වත් කිරීමේ පළමු වැඩසටහන අග්රාමාත්ය ආචාර්ය හරිනි අමරසූරියගේ ප්රධානත්වයෙන් අද (11) පාර්ලිමේන්තුවේ දී පැවැත්විණි.
මෙහිදී නව ප්රතිසංස්කරණ ගෙන ඒමේ ඉලක්ක සහ අරමුණු, ප්රතිසංස්කරණ සඳහා වූ මාර්ගෝපදේශන මූලධර්ම, නව ප්රතිසංස්කරණවලට අනුව අධ්යාපනයේ ප්රධාන කුලුනු, විෂය මාලා ප්රතිසංස්කරණය, ප්රතිසංස්කරණ ක්රියාත්මක කිරීමේ විධිවිධාන සහ ගුරු පුහුණුව යන මූලික කාරණා පිළිබඳව පාර්ලිමේන්තු මන්ත්රීවරුන් දැනුම්වත් කරන ලදී.
අධ්යාපන අමාත්යාංශය, ජාතික අධ්යාපන ආයතනය සහ ජාතික අධ්යාපන කොමිසම මගින් මෙම නව අධ්යපන ප්රතිසංස්කරණ ක්රියාත්මක වන ආකාරය සහ අධීක්ෂණය වන ආකාරය සම්බන්ධව මෙහිදී පැහැදිලි කිරීම් සිදු කර ඇත.
එමෙන්ම 21 වන සියවසේ සහ ඉන් ඔබ්බට ඇතිවිය හැකි අභියෝගවලට මුහුණදීමට සමත් පුරවැසියෙකු නිර්මාණය කිරීම වෙනුවෙන් මූලික අඩිතාලම දැමීම සහ එම නව පුරවැසියා රටේ තිරසර ජාතික සංවර්ධනය සහ සාමය පිළිබඳ ක්රියාවලියට දායක කර ගැනීම මෙම නව අධ්යාපන ප්රතිසංස්කරණයන්හි ප්රධාන අරමුණ ලෙස සාකච්ඡා කර තිබේ.
අධ්යාපන ප්රතිසංස්කරණ පිළිබඳව මූලිකව පැහැදිලි කිරීමෙන් අනතුරුව පාර්ලිමේන්තු මන්ත්රීවරුන් විසින් එම ප්රතිසංස්කරණ පිළිබඳ ඔවුන්ගේ අදහස් සහ නව යෝජනා ඉදිරිපත් කරන ලද අතර එහිදී විශේෂ අවශ්යතා සහ ආබාධ සහිත දරුවන් වෙත මෙම අධ්යාපන පරිවර්තනය ඇති කිරීමේ වැදගත්කම සහ අවශ්යතාවයන් පිළිබඳ විශේෂයෙන් සාකච්ඡා කෙරිණි.
මෙම සාකච්ඡාවට අධ්යාපන හා උසස් අධ්යාපන නියෝජ්ය අමාත්ය වෛද්ය මධුර සෙනෙවිරත්න ඇතුළු පාර්ලිමේන්තු මන්ත්රීවරුන්, අග්රාමාත්ය ලේකම් ප්රදීප් සපුතන්ත්රි, අධ්යාපන උසස් අධ්යාපන සහ වෘත්තීය අධ්යාපන අමාත්යාංශ ලේකම් නාලක කළුවැව, ජාතික අධ්යාපන කොමිසමේ උප සභාපති තිලක් ධර්මරත්න යන මහත්වරුන් ඇතුළුව අධ්යාපන අමාත්යශය, ජාතික අධ්යාපන ආයතනය සහ ජාතික අධ්යාපන කොමිසමේ නිලධාරීන් සම්බන්ධ වූහ.
Leave a Reply