පෞද්ගලික බස් රථ, ත්රිරෝද රථ හා පාසල් සිසුන් ප්රවාහන රථ නියාමනයට පෙර පවතින ගැටළු සම්බන්ධයෙන් සාකච්ඡාවක් ලබාදෙන ලෙස ප්රවාහන සංගම් රජයෙන් ඉල්ලිමක් කර තිබේ.
සමස්ත ලංකා පාසල් ළමුන් ප්රවාහන සංගමයයේ සභාපති මල්ශ්රී ද සිල්වා සඳහන් කළේ රජය විසින් ඊට අවශ්ය ක්රියාමාර්ග නොගන්නේ නම් වෘත්තීය ක්රියාමාර්ග සඳහා යොමුවන බවය.
පෞද්ගලික බස් රථ, ත්රිරෝද රථ, පාසල් සිසුන් ප්රවාහන රථ ඇතුළු ප්රවාහන මාදිලි රැසක් නියාමනයට අවශ්ය පියවර ගන්නා අතර ජාතික ගමනාගමන කොමිෂන් සභාවට මේ සඳහා සියළු බලතල පැවරීමට පියවර ගන්නා බවද ප්රවාහන, මහාමාර්ග, වරාය සහ සිවිල් ගුවන් සේවා අමාත්ය බිමල් රත්නායක මහතා පසුගියදා පාර්ලිමේන්තුවේදී ප්රකාශයක් සිදු කර තිබිණි.
ඒ අනුව ජාතික ගමනාගමන කොමිෂන් සභා සංශෝධන පනත් කෙටුම්පත පසුගියදා පාර්ලිමේන්තුවේදි සම්මත වු අතර පෞද්ගලික බස් රථ, ත්රිරෝද රථ, පාසල් සිසුන් ප්රවාහන රථ ඇතුළු ප්රවාහන මාදිලි රැසක් නියාමනයට අවශ්ය ගැසට් පත්රයද නිකුත් කළ බව ජාතික ගමනාගමන කොමිෂන් සභාව පැවසීය.
සමස්ත ලංකා පාසල් ළමුන් ප්රවාහන සංගමයයේ සභාපති මල්ශ්රී ද සිල්වා මහතා මේ සම්බන්ධයෙන් මෙලෙස අදහස් පළ කළේය.
“නියාමනයට කලින් බොහෝ දේවල් තියනවා කරන්න. හැම වතාවෙම මේක කරන්න හැදුවා. ඒත් අපිට කිසිදෙයක් වෙන්නෙ නැතුව රජයට ආදායමක් ලබා ගන්න දෙයක් විතරයි වෙන්නෙ. අපි ඒ දේවල්වලට කැමති නෑ. අපි කියන්නෙ මේක නියාමනය කරනව නම් අපේ ප්රශ්න සාධාරණව අහලා ඒවට අවශ්ය දේවල් කරලා බලලා අපිත් එක්ක කතා කරලා ඉවරවෙලා මේ දේවල් කරොත් හොදයි කියලා හිතනවා.නියාමනයෙන් හොඳ දෙයක් වෙන්න ඕනා. නියාමනය කියලා මුදලක් අරගෙන අපිට කිසිදෙයක් වෙන්නෙ නැත්තම් වැඩක් නැහැ. හොද විදිහට කරනවා නම් අපි බලනවා. එහෙම නැත්තම් අපිට වෘත්තීය සමිති ක්රියාමාර්ගවලට යන්න වෙනවා.”
මේ සම්බන්ධයෙන් අද දෙරණ ජාතික ගමනාගමන කොමිෂන් සභාවෙන් විමසිමක් සිදුකළ අතර එහි සභාපති පී.ඒ. චන්ද්රපාල මහතා සදහන් කළේ නියාමනයට පෙර අවශ්ය රෙගුලාසි සම්බන්ධයෙන් අදාල පාර්ශව සමග සාකච්ඡා කර ඉදිරි ක්රියාමාර්ග ගන්නා බවය.
